Café Le Suffren

在15區的café Le Suffren 是一個朋友在某個星期天下午提議的。由於大家都不想吃太多，而朋友說這裡的沙律和甜品都不錯，我們女孩子就是這樣的了，怕肥所以吃沙律，但又愛吃甜品。我每次經過賣甜品的餅店，都要幾經爭扎才逃過甜品的吸引。

由於café suffren處於15區離巴黎鐵塔不遠，屬於高尚區域，所以這餐廳也比較貴一點。

我要了個蝦，生油果沙律。其實我在巴黎都試過不少沙律，不過大多餐廳都是張一些菜和其他材料混在一起加點沙律醬便放上枱。不過這個沙律的材料都配合得剛好，而且沙律醬亦剛好，不會吃完沙律後碟上還剩下大灘沙律醬，而且才材料很新鮮，那個蝦真的很鮮甜。

甜品要了profiterolle au chocolat，上枱的時候嚇了一跳，很大份的。3 大個Puff 裡夾著雪糕，外面淋了很多的朱古力醬，再加上香脆的杏仁片，雖然要8大歐羅，但吃過後真的物有所值。

埋單加埋一杯咖啡，每位30歐羅，不過對於這個環境及食物質素，物有所值，不過不可每個星期日都來。

餐廳資料:
84 Avenue Suffren 75015 PARIS
Tel: +33 (0)1 45 66 97 86
6、8、10線metro La Motte Picquet Grenelle下車，avenue suffren 出口直行便是。

鯨呑30多隻大冬菇

上個星期收到至愛的娘親寄來的冬茹，乾瑤柱，菊花茶。週未弄好一些，本打算分幾天吃，誰不知給我呢個冬茹怪一個下午就吃完。不過對呢個奇怪現像我係有解釋的:

一、我都有好一段日子沒有吃過好吃的冬茹，上一次是4月娘親來香港替我弄嫁妝的時候給我弄了一大盤吃。順便也提一提題外話，來香港弄嫁妝只不過是娘親來香港的官方籍口，其實應該是她來跟香港的shopping作個「你死我活」的決鬥，最後如常她也寄了數箱郵包回悉尼去。真的，這個她的特有的優點遺傳了給我!

二、巴黎這邊沒有好的冬茹賣，而我亦不懂怎樣買，所以一直没有冬茹吃。

三、我，肥記，弄的冬茹很好，很好吃!

四、我是一個冬茹怪，如吃了厚肉的冬茹我整天心情會很好。

幸好肥外不愛吃冬茹，所以沒有人跟我爭冬茹吃!

另外，今天到了sorbonne考入學評核試，都不太太太難，都應付了大部份，希望能入讀初二班。而由於10點至12點的那班給取消了，但我又不太想下午上課，我定會睡了整個上午，所以我選擇了上午8點至10點的上課時間。跟導師講完走出學校的時候，心想自己定是瘋了!

嘿，要去浸些冬茹啦.....

明天法文評核試

上個星五肥外同我去咗la sorbonne報讀了三個月的法文課程，每個星期大約上15個小時的課。而明天將會考評核試，看看我的法文程度到那一個level，以後就會就結果而編班。所以呢個週未除了周圍去亦都有溫書。同肥外商議了最少讀6個月，6個月後應該可以流利的講法文了，這樣找工作應該不難。由於課程不平(要1,200歐羅一個課程)，所以我一定要努力，唔可以好像在香港那樣讀了一年都不會講幾句法文。除了找工作之外，對我融入法國的生活都很重要。祝我好運吧!

如果有興趣到巴黎學法文，可以到sorbonne的網頁看看。

巴黎兩年一度車展 - Mondial de l'automobile

今日跟肥外去咗兩年一度的巴黎車展，由於今日是公開展覽的第一天，所以在場都很迫人。這個車展共有七個展館，由新車、二手車、汽車用品至古董車都有。我只倆只是行其中一個行展館都用了兩個幾小時。而且好多人，又有好多射燈，所以館內都幾熱。不過今次係第一次去車展，而以前係雜誌都見到香港或日本的車展，通常都有好多著得好性感既車女郞，所以諗住呢次一路行都要一路引開肥外主意力。點知來到既時候，一個性感車女郞都無。當堂鬆了一口氣，哈...哈...

如果有興趣睇吓個車展的相，可以到這裡

Mondial de l'automobile主辦網址

終於肥外肯同我食壽司

24號晚是我們三個月紀念日(係呀，無工做既人係無事搵事做架)，但又唔想離家太遠吃飯，原本打算到sushi gourmet吃飯，但係原來星期日唔開。所以就去了附近一間sushi吧，Domo Sushi bar。呢到環境不錯，亦很乾淨，不過坐低才知由一個韓國家庭主理。看餐牌日本菜跟韓國菜各一半。我叫了一個泡菜豆腐為頭盆和壽司及刺身platter做主菜。而肥外只叫了一個日本燒汁牛扒。

頭盆泡菜豆腐份量很大，十足有主菜的份量。泡菜味道不菜，跟肥外一起吃過後真的有點飽。
頭盆和壽司及刺身platter, 份量亦很多，不過刺身好像切得太細，外觀差了一點。不過壽司的飯也壓得不錯，不壽司及刺身都只有3款魚跟熟蝦，似乎不可以叫platter。

肥外的日本燒汁牛扒賣相一般，醬汁略為多了一點，不過法國人吃什麼餐都好像要多汁多醬似的。

加上當晚亦叫了一支rosé，埋單70歐羅，價錢偏貴，不過16區的消費都是偏高。而今次亦滿足我吃壽司的要求，這裡在巴黎來說是不差了。不過無需特別來試，除非你特別好壽司及刺身而剛好又是星期日吧!

餐廳資料
Domo Sushi bar
7, rue Gros 75016 Paris
Tel: +33 (0)1 46 47 47 77

巴黎最大的市場-Marché aux Puces

今日做完法文測驗整個人都鬆了一鬆，可能做得不錯的關係，感覺自己的法文有進步而不致於浪費金錢，感覺沒有那麼大壓力。年尾前能應付大部份法文溝通的目標不變，我要加倍努力呀!

雖然今日要測驗，但係星期日都去了巴黎最大的市場-Marché aux Puces走。其實並不是要買什麼，只不過我真的愛看舊東西，而那邊除了賣衣物的市場，也有一個古董市場。這個古董市場要穿過一些賣衫的檔口到市場的中間位置，才到達與外面衣物市場有一個強烈對比的古董市場。在這裡都有不少遊客。賣的也各式各樣，除大路的古董傢俱外，所有舊的東西都不難找到:有書、漫畫書、黑膠唱片、衣物、相機、杯碟、首飾、吊燈等等。這裡也有一些昂貴的古董家俱，就好像走進一個免入場費的louvre一樣，不錯呀!

另外出面的衣物市場也值得逛一逛，起碼到這裡找手信是既方便又便宜。不過由於位於18區，人流比較複雜且人流多，來的時候記得小心財物，及結伴來比較安全。

Marché aux Puces資料
巴黎18區北métro Porte de Clignancourt下車沿pte de Clignancourt 直得便到
逄星期五、六及日10時至下午6時
　

終於都見識了巴黎夜生活

昨晚終於同肥外同他的朋友到了巴黎一間出名的club - VIP Room，聽肥外講這間係巴黎係最高級同多名人到到。呢到午夜先門口，而我地12點半到，門口已經見到有好多人排隊。入到club裡面，都唔覺有什麼特別，除了幾個有大的大銀幕外，其裝修跟香港的dragon-i差不多。當然如果要睇明星及網球手，整晚都見不少，不過由於我對法國的名人真的沒有認識，所以對我來說都沒什麼分別。不過這裡真的很「高級」，當我們一到，肥外跟我各叫了一杯雞尾酒，誠惠40歐羅! 40歐羅呀! 在香港很高級的地方都是100港元，這裡是雙倍價錢，但就是小小一杯。然後當朋友到齊，我們叫了一支volka及一支香檳。我真的估不到，一支volka誠惠250歐羅(哎呀，在carrefour都是10歐羅一支呀!)，香檳誠惠5百歐羅。不過這裡很會玩弄人的虛榮，因為當你叫那支5百歐羅香檳的時候，侍應會從遠送上香檳的同一時間點起一支細煙花，所以場內所有人的視線都會朝你的方向望去，所有大家都知你是買那500大洋香檳的人。所以那支香檳的價值不止香檳那麼簡單。

且不談這裡的嚇人消費，這裡的音樂還真的不錯及多元化，不會死命的放techno，所以昨晚都玩到4點因抵不了睡魔的侵襲才回家去。

最搞笑莫過今天跟娘親投訴消費驚人，她竟然覺得不昂貴???唔通悉尼的物價近年急升? 怪不得她來巴黎的時候常常都要搭的士。她常說我「大洗」，想應該是遺傳了吧!

如果想看下巴黎的夜生活，又有興趣到vip room，不要忘記電話預約，否則進場的機會都很低。(不過我看過其他club的介紹，好像budda club﹐manray等，都好像不錯，也許比vip好，怕沒有這麼高消費吧!)我就應該不會有下次啦，昨晚我們兩人就花去3百多歐羅，買雙鞋還好呀!

CLUB資料
VIP Room
76/78, avenue des Champs Elysées, 75008 Paris
Tel: +33 (0)1 56 69 16 69
Metro: George V下車
網址www.viproom.fr (不過正在更新中)

至愛的巴黎法國餐廳

post開一些餐廳資料，順便也post這一間好很喜愛的巴黎餐廳。肥外也喜歡這裡，而這間餐廳也不難找到旅遊書的推介。

第一次來Thoumieux都是五年前的事了，那時第一次遊巴黎，從一本餐廳介紹既書搵到這一間bistro，記得係當年係歐羅對港幣最低位，感覺在法國巴黎餐飲用膳並不是那麼高消費，所以當年都沒那麼在意餐牌上的價錢。不過現在身居巴黎而歐羅對港元又是的這麼的高，而且thourmieu係間中價餐廳，如果食三道菜同酒水，要預算每人50-60歐羅，所以唔係一間可以常來既餐廳。不過如果唔介意set menu無得選擇的話，連一杯餐酒只係30歐羅，感覺比較經濟，而set menu所提供的都不錯。

上一敞來Thoumieux是我家人到巴黎旅遊的時候，在這裡慶祝我爸60歲生日，而且當晚剛巧是世界杯法國對葡萄牙的比賽。

我們7點到﹐竟然一個人都無，當然法國人食晚飯時間都係8點半之後，不過七點都應該有小貓3、4 隻，但係就蚊都唔多隻，不過都無所謂，少人還好，起碼無二手煙。可知很多法國人都食煙，我想除左罷工之外，食煙應該係法國第二既national sport。

Thoumiex係一間過百年既老店，現在既主持人已經係第三代接手，所以呢到既裝修都係傳統既深紅梳化同裝滿鏡既牆。座位是比較迫，枱與枱之間幾乎沒有空位，出入的時候就要拉開張枱。

今次我要了焗田螺做頭盤同橙鴨胸為主菜，因cote de beouf一叫便要叫兩客共1kg的牛扒，所以肥外就與我爸都叫了cote de beouf (牛扒)。

我試過很多間巴黎既法國餐，thoumiex的焗田螺我覺得就最出色，之前食過一些都比較瘦的，都係急凍的貨色。而這裡的田螺都很肥美，並沒有加上太多的香草來蓋過雪藏味或罐頭味，所以應該係新鮮的了。

而我的橙鴨胸係半生熟，鴨肉是軟軟的，再加上甜甜的橙汁煮出來既醬，甜甜酸酸的醬配上略肥既鴨也不覺得油膩。

而肥外既cote de beouf半生熟剛剛好，切開都不斷有肉汁滲出來，牛肉味是很重，不過一個人要吃500g既牛扒真是很困難，而且做配菜的是焗芝士奶油薯仔，如要吃完這個餐，之前一點都要不吃才行。

由於我們要趕回家看世界杯同切生日蛋糕，所以今次無叫到甜品。不過呢到的甜品都不差，份量都比較大，如果要吃得下甜品，就要係自己個肚預留點位置呀。埋單6個人共240歐羅，每人一個頭盤、主菜同一支紅酒，由於當晚沒有叫甜品，所以比較經濟了少許。

餐廳資料:
Thoumieux
79 Rue St Dominique, Paris 75007
http://www.thoumieux.com
Tel +33 (0)1 47 05 49 75
Metro : 8、13線Invaildes 或 8線 Latour Maubourg 下車
註 : 年中無休，如果不吸煙，最好先訂位。

好耐都無食過真正既中國菜啦

其實來了巴黎這麼又久都只是試過一次中國菜，因為這邊的中國菜多以外賣形式經營，而且為迎合法國人口味，都是一些醬汁較多的菜，所以一直提不起興趣。還是早一陣子，肥外的朋友一番好意，帶我到一間高級中個餐館吃飯(牆上掛上不少牌，真不知怎樣弄來)才第一次在巴黎吃中國菜。不過當晚的中國菜令我很失望，肥外也覺得很差(經我的下，肥外對中國菜既認識已經不只係甜酸排骨，檸檬雞同春卷)。無他，大部份的菜都係煮熟一堆肉，然後淋上不同的醬汁，而且肉的質地都不好，有時偏乾，有時分不出是雞還是豬。朋友見我很失望的樣子，有點不好意思(我已經盡力扮覺得好好味架啦)。我唯有話令這裡的菜令我回憶起在離雪梨3小時的小鎮 - Bathurst 讀大學時，在那邊吃的中國菜吧。(其實bathurst的中國餐館比這裡還要好。)而這裡每人連酒水要50歐羅，用料又這麼差，發水豬頭定是這裡的名菜。經這次經歷很都没有胆量再試中國菜。

不過今次有位由上海來的同學仔推介這間 - 北方齋，所以都有保證，而且同學仔說這裡的水煮牛不錯，所以沒有埋由不試。所以今日同同學仔共四個人放學後就到呢間係第五區既餐館食晏，由於其中一個同學仔去過而推介，所以大家都好其待今日放學後既食晏。呢到離巴黎聖母院唔係太遠，而亦近我們上法文課的地方，所以唔使走到去13區咁遠。

呢到裝修都好簡單，如果唔係有人介紹都未必會有胆一試。呢到係家庭式經營，老闆娘打理樓面，而老闆就負責廚房，所以整間餐廳都只得兩個人。由於老闆兩夫婦曽在香港住過一段日子，所以他們都會説廣東話，方便很多。

我們一坐低看過餐牌都很正宗(以法國既標準，比較正宗係見唔到有檸檬雞，春卷)，四個人叫了四道菜，有水煮牛，炒牛筋，清菜及三x瓜(唔記得個名)。四道菜的份量都不才，我們四個人還剩很多，尤其水煮牛份量很多。四個菜，自己較喜歡水煮牛，辣度剛好。平時自己不太喜歡吃牛筋的，怕它的膠膠的質感。不過這裡都做得很爽口，而且帶辣還有甜味。而三x瓜有薯仔同茄子，味道不錯，不過由於太油膩，所以沒有太多。

我們四人都吃得飽飽的，連白飯3個，埋單34歐羅，每位都係8.5歐羅，一點也不貴，跟在香港吃飯差不多。當然要說好出色，當然不及香港的北方菜，不過在巴黎己經是不錯的了。而且這裡晚飯的價錢和午餐的都是一樣，所以如果來了巴黎幾天，吃膩了三文治或法國餐，不防來這間餐廳。

(後記:之後再去吃了拍黃瓜和魚香茄子煲都不錯)

餐廳資料:
北方齋 Chez Giang
18 rue du Cardinal Lemoine, 75005 Paris
Tel: +33 (0)1 43 29 32 55
metro 10 線Cardinal-Lemoine 或 7，10線Jussieu 下車行5分鐘便到。
不用訂位，星期日休息

幾間餐廳推介

為應要求，我在這裡列出幾間值得推介的巴黎餐廳:

1. Thoumieux (我至愛的巴黎餐廳)
79 Rue St Dominique, Paris 75007
http://www.thoumieux.com
Tel +33 (0)1 47 05 49 75
Metro : Invaildes 或 Latour Maubourg 下車
註 : 法國南部菜，連酒水及3道菜，平均每人消費50歐羅。年中無休，如果不吸煙，最好先訂位。

2. Le Suffren
84 Avenue Suffren 75015 PARIS
Tel: +33 (0)1 45 66 97 86
6、8、10線metro La Motte Picquet Grenelle下車，avenue suffren 出口直行便是。
註 : 法國菜，很多沙律選擇，價錢略貴，我只在那裡吃過午餐，平均每人消費30歐羅。

3. Chez Paul
22 rue Butte aux Cailles 75013 PARIS
Tel: +33 (0)1 45 89 22 11
5,6,7線metro Place d'italie 落車，rue bobillot，第三個街口轉右，
註: 法國菜，價錢大眾化而且通常迫滿人，平均每人消費30歐羅，最好早到或先訂位。

4. Sushi Gourmet
1 rue de l'assomption 75016 Paris
Tel: +33 (0)1 45 27 09 02
9線 metro Ranelagh 落車
註: 日本菜，平均每人消費30歐羅，其中一間日本菜不是中國人開的呀!

幾間之前介紹過的，不在這裡重提啦。

大部份的在巴黎的法國餐廳都不錯，不過經驗所得，大部份在遊客區的餐廳的質素都比較差，或比較昂貴，不防行遠一點，很容易會發現價錢合埋而又味道不錯的。而巴黎的11區更是餐廳和酒巴集中地，到那邊走走不難找到好的餐廳。

巴黎古董跳蚤市場

唔知點解會咁鐘意啲舊野，上星期六、日屋企附近有個古董跳蚤市場，半賣古董半賣2手物品，當然大部份時間得個睇，不過當我地他日有屬於自己既flat，我都想買番個大鏡放係火爐上。係呀，好多舊既巴黎屋都係有個大鏡係個火爐上架，好靚架。其實除咗大件既野，我都有睇中一套6隻既水晶酒杯，只不過真係賣得好平，自己又拿不定主意，諗緊邊到有位擺既時候就已經俾人買咗，不過買唔到都係一件好時，事關我成日都打爛杯，唔係碟呀碗呀，而係杯，唔知點解會咁，所以家中水杯都係唔齊一套4隻或6隻。但係唔買又唔得，係法國人做主人家請客既要求，唔同款式既水杯又唔係咁見得人。我諗唯一解決方法就去宜家買平野算數。

其實巴黎都有好多跳蚤市場，今日同同學仔講開，先知如來係18區metro 第4線既Porte de Clignoncourt 站附近有個大型跳蚤市場，而呢個跳蚤市場仲有一部份係賣古董，不過就要行得比較入少少，同埋嗰區治安麻麻地，如果去就要小心貴仲物品，同埋都係唔好一個人去啦。我自己都未去過，等我今個星期六去完再俾個報告你地啦!

搶呀! 去搶呀! 一齊去搶呀!

之前講過家陣有酒賣既地方都減緊價，咁我地當然都唔走雞一齊去襯下熱鬧。我地昨日就去咗carrefour入貨。星期六既carrefour通常都係人多啲，但係啲酒減價就更加多人，推住架車仔都有啲困難，一路行一路要不斷"pradon"(法語的不好意思)。我們主打當然係紅酒，由於我們通常每個星期都會去朋友屋企食飯或有朋友到我們家吃個「肥記也也烏」飯，所以紅酒係我們既「鎮家之寶」，今次減價當然都去搶埋一份啦。呢到買到既紅酒就等於香港既一半價錢，而且呢到有好多選擇，就算係4、5蚊歐羅既紅酒一樣味道不錯。

呢到啲人都係同我地一樣咁搶酒，一手慢少少就已經買唔到心頭好。而且呢到啲人一買就起碼兩、三打，真係好似唔使錢咁。我地呢啲慳家，所以只係入咗打半貨。不過真係好平，而且酒既種類都比平時多，有時都唔知邊隻酒好，就睇吓邊隻酒係個架上少貨，咁就買嗰隻通常都無死。

來咗法國其中一個好處就係啲酒平好多，以前係香港請朋友食飯，剩係買酒都已經要破產....家陣就經濟好多。

La rentree - 我愛9月既巴黎

8月既巴黎除咗旅遊區外，其他地方就靜得很。係我屋企附近既店舖10間有8間都係8月關門放假。而我們身邊既朋友，10個有9個都會至才係8月放兩個禮拜假。最名顯係當我早上搭地鐵返學既時段，8月既車廂內只得小貓小狗各3隻，在麵包店也不用排隊買法包。9月一到，所有巴黎人好像不知從那裡浮出來，他們叫9月la rentree。突然地鐵車廂內滿滿的，麵包店星期天早上總是有條長龍(奇怪，法國人只會在麵包店排一條整齊的龍)。9月一開始，整個巴黎都好像回復生氣，週末的古董flea market、所有賣酒既地方都在減價、早上同下午既學校門口都擠滿帶孩子上學或等待下課的家長，還有離家不遠的fun fair，真係好多地方要去，而週末也不用安排什麼節目，只是行古董flea market都也叫我開心得忘形。當然無乜野會買到啦，因為間屋已經裝滿一滿，行都無地方啦，仲買野會俾人休架!

我愛9月既巴黎!

美滿既午餐

今日臨出去Sarbonne前去咗街角既boulangerie(餅店)買咗件三文治同一件好好味既甜品-Tropezienne做我既午餐。之前肥外同我去St. Tropez佢都有同我講話呢件餅好正。但係嗰時都唔覺呢件餅有乜特別，不過直至星期六肥外買咗做佢既飯後甜品，但係就俾我搶咗大半。由於來咗巴黎之後體重一直下降，所以我無有怕，緊係當肥外唔係到同我爭既時候買番一整件俾自己啦!

你地來巴黎要試下呀，係普通既餅店都有得買架啦。

另外今日去咗sorbonne諗住報讀法文課，點知去到啲工作人員話下星期一先開始有得報名。但係明明昨晚上sorbonne網頁睇話今個星期係最後報名架。不過來咗巴黎都有3個半月，呢啲情景見怪不怪，係巴黎生活就要適應呢到既「文化」，唔係好易激死......

終於都可以唔使企係到上網啦

係呀! 好快呀，上個星期申請咗france telecom之後，昨晚已經上到網啦，前後都係一個星期咋。我家陣可以一路睇ally mcbeal既dvd一邊坐係到上網啦。最重要就係可以upload啲相啦，我會整架啦，聽日唔使番學，等我就聽日搞好佢。

今日放學後去咗驗身，之前睇咗annecy有關健康檢查既blog大概都知道會發生乜事同會有很多等待的時間，所以亦帶咗本書做準備，邊看邊等所以都不怎難過。反而有個20出頭加拿大來的男子，對我抱怨覺得要驗身很不合理，覺得自己從加拿大- 一個文明發達的社會來又不是第三國家，法國理應歡迎佢而不應有那麼多繁複手續。對我來說, 一、在我生活係sydney成為minority的日子裡，見過或體驗過不少人認為自己比其他種族優越。還記得係第一年宿舍內跟舍友爭論土著應否擁有土著的旗和移居的人應否放棄自己的國家文化爭辯得臉紅耳熱。所以我並不喜歡那加拿大人那篇因來自北美而自己應比別人優越既言論，二、香港人移居到加拿大或其他國家前，還不是要進行健康檢查，而且還有其他繁複的手續。這加拿大人亦不願意學法文，我想他將來在巴黎的日子一定不易過.....

近呢一、兩星期天氣都很好，聽日會到一個photography既展覽望望或週圍逛逛。9月既日照已明顯比7、8月既短，8點多天都黑得七七八八，肥外話12月時4點幾就會天黑，所以見天氣好要把握出外走走的機會。

好似會好忙既一個星期

近兩個星期，唔知點解好似好忙咁，放學後回家溫習當日學過同做功課就差不多要煮晚飯既時候。我亦買咗本法文既文法書好讓我係metro到睇。來了都差唔多有4個月，我既法文好像無特別進步，所以我不得為自己定下一個目標，就係係年底前能講流利既法文。我連睇Ally McBeal既DVD都着咗法文subtitle，睇下我幾咁進取。

唔知法國人係咪因為對自己既語言咁自豪，除非你能說一口流利正宗100%無帶任何語言口音既法文，只要有少少唔正宗，佢地都唔會明你講乜。唔似英文，就算有乜口音，能操流利英語既人都會有耐性咁去了解。可能因為咁既原因我「立志」要操流利法文，仲要3個多月時間，我會努力。當然我亦要比睇有法文字幕既ally mcbeal要更進取一點，星期一我會到sarbonne(一間巴黎既著名大學，就等於英國既cambridge)去睇下佢地既法文課，我打算10月開始改讀全日課程。我知道可能每日放學後我將會心力交瘁，不過如果努力3個月可以講流利法文，一來方便我搵份好工，二來我又可以「投入社會」，我諗我個腦都會原諒我咁殘忍對佢架。

另外星期二要去為長期居留證驗身，我係其他人口中知道除咗驗身之外更要睇一套有關法國歴史同文化既電影另外其他既時間將會係等同排隊，所以加埋會佔上整個下午。上次攞臨時居留證既時候因為有肥外公司既律師為我安排一切同陪同，所以整個過程只用咗半個小時。其他人通常都會用上一天至兩天既時間，而大部份既時間都係-等，而用上兩天以上既日通常都係文件唔齊。我有時真的不明白，似乎法國政府有心考驗我地既取留法國既決心。

所以今個星期將會係忙碌的一個星期。

不得不提，係我地等咗free既上網，住宅電話同有綫電視既安裝兩個月後 - 當然係仲未裝好。肥外終於忍受不住，上個星期一改申請france telecom既套餐，而當日既晚上我地既住宅已經用得，而上網同電視應該會係呢幾日都有埋，到時我終於可以合法上網啦。

認識了很多從不同國家來的同學仔

今日係8月份上法文文法堂的最後一日，所以導師安排了每人帶點自己國家的特色食品於課後來個大野餐。最後因為導師要趕下一堂課，所以無去到luxemburg公園而留係課室，每人攞出自己帶來既食物放滿整張長枱，甜品都無地方放。有位同學仔更表演長笛。課室大野餐後，我地還轉到附近既咖啡室繼續我地既細細聲講大大聲笑，不知不覺就3點幾。有幾位同學仔會返會佢地既國家，不過大家交換咗電郵同地址，雖然好大機會都唔會再聯絡而且大家都係相識很短時間，但係就覺得好warm同close。

係法國文法栛會所識既同學仔有啲同我既背景都好相同，都係過埠新娘，所以就比較投契，想我地同樣遇到困難同問題，其他人好難會明白同了解，跟佢地傾談感覺人好像輕鬆咗...

上法文課都差不多3個星期了

係法國文化栛會上法文課都差不多有3個星期了，由最初因為學費昂貴，怕上課後沒有多大進步，怕浪費了金錢和肥外會對我的法語能力加深期望而有所壓力，不過到現在卻享受每一天的3小時上課時間(雖然要早起)。本應只付到今個星期的學費，不過應該會多學一個月，到時再決定怎樣。
其實由報名到上課到轉導師的整個課程中，我覺得好像有「人」暗中幫我的，不要誤會我是什麼教徒向你說什麼見証。我只是覺得好似生命在提示自己，凡事並不是這麼壞，只要肯試，結果往往出人意料。
就好像我剛報名做評估法文水評的測驗中，因為寫文的一環做得很差，所以給編去A1，是beginner之後的一個level，買了課本回家看過後，導師會教都很淺，比我會講的淺很多，心想所付的6百歐羅快泡湯既時候，在上課的第一日，準時到達課室，但一個人都沒有，再多等5分鐘如是。心知不妙，(可知我係法國這般段日子，凡事都會有些「意外」，就如申請上網一樣)所以就走到office問，才知因為我上的那班因人數不夠被取消了。而早上都沒有A1的班，所以給安排到A2。上了兩星期的課，又開始覺得導師欠缺耐性，總不給我們嘗試講的機會，正考慮好不好繼續的時候，就由於接著的星期，繼續報讀的學生只有兩位，所以我們便給安排到另外的一班。而現在這一班既導師都比較有耐性，會慢慢給我們機會去講再加以糾正，而且她亦喜歡和學生溝通，好像我們將會在星期四上課後到jardine du luxembourg野餐。所以想想凡事都不要想太多，「船在橋頭自然正」。
不過......我到現在仲未有得合法上網，而且之前以為就快得，其實係仲未得......

法國人幾點食飯

我諗我同好多香港人一樣，都係鐘意大概7點至8點食晚飯，不過自從同個法國人拍拖起，7點鐘食飯係要好努力爭取番來。來到呢個巴黎，係敵衆我少既情況下，只係可以係世界杯法國比賽既日子食個「早飯」之外，其他既日子都係大概9點到食飯。




法國人愛餐前先飲一些雞尾酒，好似如果我地邀請朋友到家中作客，通常佢地都會係8時至8時半到達，先來餐前酒同小吃，有講有笑一個鐘至會正式進餐。所以9 點後食飯都好難走雞。 另外法國人如果應邀到8點朋友家中食飯，佢地一定會至少遲到10分鐘，如果準時到就會唔係咁有禮貌。好可能因為呢個原因，除左去人屋企食飯外，法國人應約十次有十次都係遲。


早前我地約左個朋友食飯，起初話9 點(我已經覺得好遲)點知改下改下仲搞到10點半先齊人，餓到我差不多想投降俾係左近麥記。跟住仲要飲杯cocktail先叫野食，到個餐上枱既時候己經係午夜時間。除左話明係消夜外，我咁大個女都係第一次咁夜食飯，食完之後，第二日都唔知食唔食早餐好….


呢間餐廳叫Libre Sens，由於係遊客區Avenue des Champs Elysees同走restaurant-bar 既間局，所以我地咁夜都可以order。而呢到以紅黑為主要調，所以夜晚來都幾黑下。不過就好有情調。 而今次由於好夜既原因，我地都只係叫左主菜，並無叫頭盆。而我就叫左beouf tartare (生牛肉)，而肥外就叫左Blanquette de veau (牛仔肉)。兩個賣相都不差，而且份量都好大份，可能呢區美國遊客比較多。


我既beouf tartare (生牛肉)都生鮮，餐飲亦花左時間醃牛肉，同加左好多配料。而跟餐既薯條亦都好脆，最後雖然好大份我都差唔多食晒。由於我都係第一試Blanquette de veau(牛仔肉)，剩係覺得牛仔肉好「林」，而肥外就覺得個汁煮得好正。如果唔計酒水，每個主菜都概都係20 歐羅之下，以遊客區同份量來計係非常化算，而且我亦好滿意食物質素，所以下次都會再來，不過就唔會再咁夜啦。另外一提，如果要confirm有位就一定要book位呀!


餐 廳 資 料 :

Libre Sens
33 rue Marbeuf
75008 Paris
1 線Franklin D. Roosevelt地鐵站出行一分鐘就到
電話: 01 53 96 00 72

巴黎很有名的雪糕店

係巴黎近聖母院附近有幾間同一個名既雪糕店叫Berthillon，係巴黎進住既人都會識得呢間雪糕店，來到呢區一啲都會搵唔到，一來因為佢有好多間分店係個ile de la cite岛上面，二來佢地都會有係龍係到排隊買雪糕。我試過佢地個朱古力味，好似咬緊真正既朱古力咁，一啲都唔覺得係人造既味道，用料都應該唔會差。不過尼到賣既都係一啲傳統既味道，而且一個雪糕球都要2個7歐羅，一啲都唔平。不過如果遠道而來，都要一試。呀，聽人講好似棋街入面既會平過啱啱過橋嗰間，所以要格下價呀!

Berthillon
係1區
rue de la cite, ile de la cite
有幾個metro station都行到過去
1, 4, 11, 14線既Metro Chatelet
4線既Metro St Michel

巴黎既秋天

自從8月頭起就凍到而家，諗住會熱返，不過都成個月都係咁涼，而發現啲樹有啲都開始灰，所以都應該係秋天啦。所以如果近排會來法國玩既話，記得帶多件衫，因為呢到既秋天就好似香港既初冬咁，得十幾度咋。而且呢到好乾燥，我每日都要擦好多cream，仲要一日幾次，如果唔係就會好癢。所以記得帶多支cream添呀。

日光日白係巴黎市被突襲

星期日去咗第五區既清真寺行，本來打算到裡面走走，不過突然落大兩，所以只係去咗清真寺背面既cafe坐同歎杯薄荷茶同中東既甜點。呢間餐廳都好多人到，大部份都係遊客。我地選擇係花園坐，週圍都係花花草草，環境好遊閒。當肥外買咗甜點坐底既時候，一群麻雀已經係週圍守候，係我地唔覺意既時候就會走近兩步。搞到我地好似打仗咁，守住我地既甜點，一唔小心就會俾人突襲成功，偷咗啲餅碎，情況都幾搞笑。

呢到既薄荷茶都幾好飲，係我expect之外，而我就唔係咁好佢既甜點，因為真係好好好甜架，肥外呢個甜怪就差唔多食晒3件，唔怪之佢來咗巴黎之後，身形一路......

係清真寺後面就係 jardine des plantes，又好多唔同種類同既稀有品種既花花草草，都係一個影相既好地方。

清真寺Mosguee de Paris
Rue Geoffroy
Metro Place Monge (7綫)
星期四至日 9am-12pm, 2pm-6pm開放
回教假日休息

另外今日有個好消息，好可能我好快(等多兩個星期)可以合法上網啦，horay!!

救命呀....唔怪之細個唔肯去睇牙醫啦

星期六唔小人整"bun"咗隻門牙，咁就約咗今日去睇牙醫。不過我都帶咗肥外同我一齊做翻譯，但係唔知點解，當搞完一輪，俾埋錢出到來先知其實無補過，最慘都係肥外要係食飯時間趕陪我，搞到佢今次白走一次。本來諗不如聽日返去叫佢再搞搞，不過睇佢咁馬虎，都係搵過第二個好啲，今次睇完之後個口入面都好似有啲痛。係香港我係去我個小學同學Winnie度搞我啲牙架，我覺得佢細心同手工好好多。如果再整唔好我諗都要等我年尾返香港搵佢先得啦。

繼續没有合法上網的日子

都差唔多兩個月都仲未裝到上網，所以大部份時間我都係企係窗邊上網，而且又唔係咁穩定，所以咁耐都仲未upload到啲相俾朋友睇，真係唔好意思，我記得架，當我一裝好上網就會第一時間搞架啦，等我呀!

聽日要返學所以要早啲瞓，so far都唔錯，而且都唔覺得悶，個人覺得比香港既alliance francaise教得好，係到既老師都可以提起我學法文既興趣。好多人都係係外國來一個月至一年來學法文，如果有興趣學法文可以check吓af係香港同法國既網頁。

好攰既星期三

今日上咗三個鐘既oral堂，雖然唔悶而且好快就過咗三個鐘，但係上完堂之後就有啲心力交瘁，就死就死，突然覺得metro station好似好遠咁。返到屋企食過晏後就要出去carrefour買聽日邀請朋友到屋企食飯既野。自從搬咗入新屋後，計計埋埋都已經係第8次啦。無計，外國人興呢味，我地亦到過好多朋友屋企食飯，叫做有來有往....走都走唔到。一陣間update完呢到就要整定啲甜品，唔係聽日無時間整，今次整panna cotta，最緊要簡單...


講番巴黎，有好多建築物都過百年歷史，昨日行過ile saint louis，即喺係seine河上同係聖母院座落既嗰個岛，有啲屋都成3、4百年歷史，仲係住緊人架。我地家陣住嗰間都叫後生，得70年歷史。每個時期既建築物都有嗰個年代既風格，睇得多就開始估到係咩年代既，再唔係大部份既建築物都會係外牆標明「出生年份」。另外如果曾經有個名人係個建築物進過或係到死咗，佢地都會標明架。所以就算唔係行緊旅遊區都可以感受到巴黎深厚既歴史文化。我諗如果香港既大厦都咁做，實俾人話係凶宅啫。

人造沙灘

上個星期二終於都攞到居留證，亦都話我可以搵工做，因為7月同8月巴黎大部份既人都會放長假去旅行，9月就會開始返工，所以9月都係搵工既黃金期，我當然亦都砌好份CV，今日已經開始上網搵工(不過我仲未裝到internet)，仲寄咗幾份CV出去，希望快啲有回音。而今個星期一仲開始法文堂，每個星期上五日，星期一至五，9點至12點。到目前為止都ok啦，起碼知佢講乜啦。


今日係法國既假期，同肥外去咗seine河旁既Paris Plages行，初初以為無乜突別都係擺啲沙係到啫，點知去到都幾多野玩，又有表演、爬石等等，氣氛都搞得幾好。不過成個8月既天氣都幾凍吓，所以都無乜人係到曬太陽。呢個Paris Plages會去到8月20號為止，如果來開巴黎都值得去行吓。

因為無聊所以呑咗成十幾粒藥丸

天氣差，落緊毛毛兩，又凍，又無乜地方想去。唯有係屋企偷隔離屋既無線上網。點知條線又唔生性，每五分鐘又斷線。咁諗住不如睇下書，但係睇緊啲本Hogo's 既"The Last Day of a Condemned Man" 講1931年9月既法國，有一個男子被判上斷頭台死刑，係行刑既時候唔知係乜原因，刀落咗四次都砍唔斷個死刑犯既頭，而當時個死刑犯仲要係完全清醒。最後佢抬住個斷又唔斷得晒既頭企咗起身，求啲人放咗佢。不過最後佢地都用咗把屠夫刀張個頭切斷，估唔到當年既法國人咁蠻夷，佢地知知乜為人道架?

越睇就越灰，所以都係放低本書等心情好先同佢來一個人道同死刑既論點"intellectual torture"。咁唔睇書又無聊呀，咁我就諗起不如來做一個實驗，就係呑藥丸，我走去厠所攞起肥外用來去"魚"既內服藥一口氣就呑咗十粒。吞咗之後又好似唔係咁足夠引證要想表達既，所以就呑多幾粒，心諗都係時候打電話俾我既致愛同佢講番幾句話。但係講咗俾肥外知之後，佢竟然除咗笑到半死之外，就係講咗句「小心肥呀!」唔係應該立該趕返屋企睇吓個嬌妻有無事既咩，再唔係都問吓我係咪撞得好"魚"呀?

不過我唔係想引證肥外有幾關人心我，而係想話俾大家知我吞既藥係法國發明，適合任何人士服用(糖尿病患者除外)，同一類藥唔同包裝可醫唔同既病，只係成份多少唔同，小朋友食多多都無問題。點解，因為其實佢地只不過係糖，而樽上既號碼代表糖既濃度。咁你會問我點解糖都可以去"魚"，我都唔知，不過食呢啲藥既時候就要非常之小心唔可以接觸到啲藥，所以每個樽口都有待特別裝置，如果唔小心掂到啲藥呀.........咁啲藥就會無效架啦。

講真我唔知點解法國人會咁信隻藥，一來佢係100%糖，而一支5g既價錢可以買到成兩kg既糖，似乎法國人比我地中國人更迷信。都係上網搵吓邊個咁有商業頭腦發明隻藥先。

好彩肥外唔識睇中文，唔係俾佢知我係到取笑法國人既文化實俾佢捉上斷頭台，哈..哈...

巴黎既公園

今日好開心咁發現咗個公園，仲要離屋大概行15分鐘就到，位置係巴黎既西邊叫-Bois de Boulogne，個公園面積都很大，而公園內有個湖，湖中心有個岛，岛上有間餐廳。如果有時間可以係湖中'餐'艇仔，亦可以租單車快快咁走成個公園一圈。而今日我地兩個就去咗呢到跑步，來咗巴黎今日都係第一次做運動，所以都未住個湖跑到一個圈就要上氣唔接下氣咁叫停。不過如果你會係巴黎逗留一段日子，又睇到啲舊野有啲悶，咁你可以來呢到走走，或都野餐都可以，而且呢到都有好多靚景影相呀。

呢到一啲都唔難去，坐metro line 10，Porte d'Auteuil 落車行兩、三分鐘就到。

住巴黎酒店以外既選擇

之前有位網友問我租Service apartment既資料，諗吓諗吓不如介紹埋俾你地，因為呢個網站我都用咗好多時問搵，一來平同佢地收既agent fee都比夠平。不過就比租酒店麻煩，原因係個網站係做一個中間人既角色，幫屋住搵租客，所以佢地未必即刻可以話你知個單位係咪available，而confirm之後又要簽contract，所以都要兩至三日時間先可以搞掂。不過我都覺得佢地好efficient，所以如果你地逗留巴黎多過3日(不過大部都要租一個星期)既可以試吓，個網址係www.lodgis.com

没有(固定)網上的日子

没有固定上網只因由搬到新居到現在都有一個月既時間，但係都未裝到。可憐老外每星期都打電話到isp問，第一次回兩星期，接着係三星期，四星期，而今日既回覆係唔知幾時裝到。要法國人認識服務質素﹐非將「服務質素」納入小學的公民教育課程不可。否則同法國人埋怨服務質素，佢地好大可能以為你覺得餐廳收10%服務費太多。
又或今次係我地「申」不馮時，只因法國人七月同八月係放假既日子，佢地放足一個月都不足為奇，所以今次我地好大可能要等到9月先有得固定上網...
如果你咁啱係法國，又想搵ISP既話，我可以介紹我嗰間俾你架，叫FREE，唔好問我點解叫「唔使錢」，有時法國人用英文都係幾莫名其妙架。

講開法國文化，我久唔久就會係地鐵見到醉酒佬(又真係好似未見過有醉酒婆)，同好多法國人講巴黎既生活，佢地都話巴黎既人生活緊張，比好多大城市更誇張，來自香港既我固然覺得奇怪，不過經過兩個月既巴黎生活又開始感受到生活迫人既壓力。一來入息稅沉重，消費稅又差唔多成20%，人既收入扣除税後都以經無咗一大部份，消費又高，而租金以收入比例來計又高。所以普通既巴黎人並唔可以好似香港人咁成日出街消費減壓，所以唔知係咪咁佢地都好多時借酒消壓(法國既酒係歐洲都係數一數二平)。有時見到啲醉酒漢尿濕自己同架車廂，都有警惕作用。

新朋友

係我新屋既看更養咗兩隻好可愛既貓，其中一隻已經係我既好朋友，每次喵喵咁叫佢，佢就會好開人咁走過來同我玩，所以我每日都會花幾分鐘同佢玩，我諗佢就係我係巴黎既第一位朋友仔。

消失一個月後

多過一個月都無更新呢到啦，無計啦，屋企申請咗成個月都未裝到internet.....無乜可以做到，唯有九久唔久去internet cafe check 吓email，(咁耐都係兩次咁大把，無計都幾遠吓)
無乜野做，又無電視睇(都係未裝到)所以就會吓書，而最近睇咗一本叫"one year in merde"既書，講一個british係巴黎一年而因文化既差別而經歷既搞笑野。而我而家係巴黎睇就真係大有同感....
唉呀，夠鐘要走啦，希望今個月內裝到internet啦，有大把野同你地講呀!

倒數一星期

仲有一個禮拜就係我既大日子，所以今日會飛去toulon準備。唔知點解自己一啲緊張既心情都無，反而没有多大期望。希望可以快啲攪完番來巴黎搬入新屋，之後等自己可以努力搵工，唔使無無聊聊咁過日子，有番自己既生活。始終放假同失業既心情係兩回事．．．
不過星期二會見到雙親，每次見佢地都好似老咗啲咁，又時會怪自己呢10年來都會成日係佢地身邊，未能好好照顧佢地。
未知係toulon可唔可以上到網，所以如果唔係就會要個多星期後27號先番來，到時先可以update呢到。祝我我運吧!

我係抵死架

明知係巴黎既壽司好食有限，但係同朋友係MSN傾開食壽司就搞到好想死食，心知係到搵間好既壽司店係非常之難。所以就行咗去la fayette既超級市場搵，應該有啲保證，因為記得以前呢到有得賣外賣壽司。點知最係都空手而回。走出la fayette行去後街就見到有間叫sushi wasabi既餐廳，好明顯係有壽司賣架啦。諗到無諗就一支箭咁衝入去，攞咗盒三文魚壽司就去俾錢。跟住個侍應就俾個托盤我上樓上雅座，先唔講環境，一坐低點解枱面有一支支辣椒醬，遠處又傳來侍應圍埋一齊用越南話閒聊，再望托盤嘩好似未抺過，上手同上上手同上上手既咖啡漬仲係到，最係睇真吓我既壽司就真係－慘不忍暏．．．．自我安慰：「凡事點可以靠外表架！」。但當咬咗一口就啲飯好實就知係隔夜壽司，魚唔新鮮，飯偏甜，亦唔係一粒粒係一'pat pat'。你只要用啲想像力諗吓落多咗水煮既飯放咗雪櫃雪硬咗,就係咁啦。唉.....我都知自己抵食架啦,都係等番香港先一次過食夠佢啦。我食既時候就覺得openrice既食家去試大久保既時候真係用咗好大既勇氣。而且大拿拿8歐羅，早知食個kebab都係4歐羅。最後係食唔晒，但係走既時後有啲胃肚﹐唔知係我食得唔開心定係個胃投訴呢?

記住呢間餐廳叫sushi wasabi係Opera既la fayette homme 後面，見佢係店裡有告示話係Saint Germain有一間，請大家小心!小心!

過百年老餐廳

上個禮拜兩日既時間租到個apartment，係16區距離巴黎鐡塔大概有4個地鐡站，離老外番工既地方亦不遠。為左慶祝吓，所以我地就去左咁啱係我地service apartment對面﹐巴黎第9區既Chartier Bouillon Restaurant。

Chartier係一個有過百年歴史既餐廳，由1896年開業到家陣都無搬過，所以如果要體驗一吓傳統法國bistro dining，呢到會係一個好選擇。而且呢到另一個出名既原因係抵，平均每人消費都係15至20歐羅，係呢到來講真係非常經濟。

我地兩個人當日叫埋半支紅酒同每人三道菜都係40歐羅，而且份量都好大。當然咁既價錢唔可以要求好高，個人覺得佢地既食物唔太花巧，以呢個價錢有呢個質素係好抵架啦。要知平時一般餐廳非三、四十歐羅一位不可。就算去St. Michel 既學生區食到20歐羅一位，都一定無咁既質素。我覺得呢到就好似法國既翠華，不過當然Chartier既招呼好好多。要真正感受巴黎既飲食文化，但又好似我咁無咁多銀両去米芝連廚師主理既餐廳，咁就要試吓Chartier。

詳細既食評將會係Openrice登出，所以記得得閒去望吓。

餐 廳 資 料 :
Chartier Bouillon Restaurant
7 rue du Faubourg Montmarte
75009 Paris
電話: 01 47 70 86 29
Grand Boulevard 地鐵站出行一分鐘就到

法國人有幾愛日光浴?

亞洲既女仔成日都要美白，當然我亦係其中一位擁戴都，無他，試過曬黑，真係唔係咁好睇而自己又接受唔到。不過法國人有一身古銅色既膚色真係覺得健康啲同靚啲架，而好多男男女女都追求一身古銅色既膚色。係巴黎由於無海灘俾佢地曬太陽，所以係好多公園都會見到有人打大赤膊係到大曬特曬，唔係海灘都會見到有人著比堅尼。不過好似相中呢位人兄咁，係條橋中間曬都係第一次見。佢真係識搵位，睇吓週圍既風景幾正，又無野阻住啲太陽。
我聽老外講巴黎人愛曬太陽，所以政府會係每年既7月1日起Seine河兩旁造個人工沙灘，俾啲人係沙上面曬太陽。不過當然無人會落水啦，除非嗰個人想上岸之係臭成個禮拜啦。

登咗啦, 登咗啦!!

如果你地仲未知道，OpenRice為香港最多人瀏覽既餐廳食評網站，由一班義預既業餘食家主持。佢地會不定期咁舉辦活動，包括飯局，燒烤等活動。佢地好歡迎新既食友參加佢地既活動，佢地個個都好好人架! 如果你地怕羞既話，可以先post你地既食評同睇吓佢地forum。
而我呢，send咗我係法國有關食物既post俾佢地，而啲食評已經今日係頭版登咗出來啦! 係呢到要再次多謝提議同俾呢個會我既FoodKing，佢仲唔怕麻煩咁幫我編輯同post上網呀!
唔好等啦，去睇啦!

係就係好遲....

不過好過無啦，其實係自己都唔記得咗。因為仲未知邊度有可靠既晒目舖，所以啲菲林都係未晒好。所以睇住啲數碼相先啦。
去相

尋找巴黎麥當勞

以我好個人及到過既有限數目既發展國家既觀察，麥當勞就好似7.11咁，緊有一家係左緊。唔好以為我鐘意食麥當勞，只不過第一次去法國既時候好奇怪，點解好似唔係咁覺有麥當勞。其實法國人鐘意cafe文化，美國既快餐文化係呢始終唔係咁普及，你知啦歐洲人樣樣都講享受，佢地會比較鐘意係coffee shop坐低慢慢歎。快始終都唔係呢到既文化。所以呢到既麥當勞都好「順應民意」，將佢既招牌紅紅黃黃拿走，連個golden arch都無埋，感覺就同普通既餐廳差唔多。攪到咁「親民」之後，就緊係無好似香港既咁搶眼，所以第一次來真係以無呢到無麥當勞。。以我呢個marketing出身既人，golden arch係企業品牌標記，係重要資產之一，所以可想而知佢地做左個好大既讓步。除左麥當勞之外，另外一間類似麥當勞既叫Quick，睇個名都知係快餐店仲要用埋個英文名。如果講食物質素大家都係咁"正"啦!

我諗無人會要麥當勞既地址，如果真係要既話就留言俾我啦。

美味法式曲奇Macaron

本人覺得好多法國甜品都甜過我可以抵受既程度，唯有Macaron我就非常之喜愛。第一次係巴黎Laduree跟風排隊買完之係就迷上。呢一兩年要搵Macaron並唔難，係olivier，ifc既Le Gouter Bemardaud
都有，不過自己覺得比起Laduree都係一般，反而舊既文華cake shop就真係泊得住Laduree既出品，可惜文華cake shop要等裝修好先會開番。
今日行開Printemps百貨公司Haussmann店，Laduree係度開咗間，咁耐都無食過緊係買兩件外賣，每件3.75歐羅。另外都有細件既買, 不過無問幾錢。
咁啱巴黎地鐵又係放工時間有限度罷工，攪到要好似係春節迫火車返鄉下過年咁誇張，攞住兩件餅要好小心唔好夾碎，返到屋企有件都碎左少少，另外一件都完整無缺，好彩!
我要既係朱古力Macaron，算係傳統既味道，另外仲要五顏六色既味道，試過幾次不過都係鐘情朱古力味。面層香脆,而內裡就係朱古力cream。有水準既Macaron就會係咬落脆既一層會煙煙un un，而朱古力cream一層又會太甜同oily。由於唔係太甜同唔油膩，所以心理上都好似無咁肥...
Laduree係巴黎有四間分店，如果希望坐低飲個下午茶既話我會介紹係第8區rue Royale(街名)嗰間，因為Laduree都有百四年既歴史，而rue Royale係佢既老總店，所以都好有舊巴黎既情調。而門口成日都會見到有人排隊買Macaron。

Laduree分店
1. 16, rue Royale 75008 Paris Tel:01 42 60 21 79

2. 75, avenue des Champs-Elysees 75008 Paris Tel:01 40 75 08 75

3. Printemps 百貨公司內, 64, Boulevard Haussmann 75009 Paris Tel: 01 42 82 62 00

4. 21, rue Bonaparte 75006 Paris Tel:01 44 07 64 87

第一個法國"食評" - 不過唔係法國餐

來咗都有個多禮拜，大多數都係食三文治，arabic kabab 或者係service apartment 有限設施之下而煮既求其餐。咁耐都無食過我至愛既粉麵，所以昨晚忍無可忍之下，同老外坐咗20分鐘地鐵去咗13區食出名既越南牛肉粉。
第一次見到門口要等位，即刻好有親切感。(哈..)其實呢到去餐廳食飯都唔興等位，所以呢間餐館都真係幾出名。大概等咗十分鐘就要位，好快咁叫咗特別牛肉粉、生牛肉粉、春卷同兩支喜力。唔使10分鐘所有野已經上枱。
春卷唔熱，好明顯係炸定，而且啲"咸"無味，好少。
只於牛肉粉，特別牛肉粉比生牛肉粉多咗牛丸，牛栢葉同熟牛肉。麵一上枱就有好重用花椒八角既香味，份量同賣相都不俗。，當放入湯後啲牙菜都覺得比較硬，可能係牙菜比較粗身關係。牛肉唔係咁"林"，而且亦唔夠薄，所以熟咗之後比較"鞋"身，牛丸係粗丸，來貨同係好濃既湯底蓋過既關係，並食唔到牛肉味。而隨自己喜好而加入既九層塔好新鮮，加入湯後同牛肉一起吃有清香既味道。最後河粉係幼身一種，並没有煮得過火，而且有咬口。
最係埋單24.7歐羅，係到兩個人一餐來講叫平，當場係香港唔使2百蚊都可以。不過量質素如果比起係Sydney滿佈越南餐廳/人，當然係普通水平。但比起香港來講，已經係好正啦。所以如果來開巴黎又經過13區可以一試。

餐廳資料:
Pho Banh-Cuon 14
129 Avenue de Choisy
75013 Paris
Metro: Place d'italie 出Avenue de Choisy直落就係

降落巴黎

都巴經來咗巴黎又7日咁多啦，因為剛剛到既幾日病咗幾日，而好番之後就忙住搵屋，所以都無特別做過啲乜野。又或者失業既人都係無所事事架啦。今日應該會決定邊間屋會租，真係唔講唔知，呢到唔似香港咁多屋租，但又多人搵屋租，所以如果睇啱，就要即刻決定，唔係就會俾人要咗架啦。
等我地confirm咗邊間flat，之後再影相俾你地睇。

買到一本好書

我成日都想搵本影相既書可以由淺入深咁介紹除咗光圈快門既栛調之外，仲可以介紹點先為一張靚相，點樣改善一啲相既構圖、光既運用同突出相既故事性。咁啱嗰人行過中環既三聯叫到呢本書，攞係手睇又好易明，所以就買咗啦。如果你好似我咁係影相新手，又無上過亦暫時無興趣上攝影既課程，咁呢本書都應該幫到你。就算你係攞住普通既digial自動相機，我都覺得睇完之係會有幫助。雖然書名係digial掛帥，但係我反而覺得個書名都係為迎合時下流行digital影相，書中所講既技巧都係無論digital定菲林相機都啱既。


書名: 寫我心情Digital images
作者: 翟錦文
書價: 定價港幣148元
銷售點: 我係喺中環近蘭貴芳既三聯書局買 或 CP1897.com

番來啦!

係佛誕既時候去咗越南，主要都係係胡志明市。今次都無好似上次係angkor咁影咗多相，主要都係因為係胡志明係一個城市，對我來講無廟宇咁吸引，而且大部份市間都係搵食，(啲野實再又平又好食)只有係有日去Mekong River影多啲相。
我仲未晒相....無計..忙，不過就有啲數碼相可以分享下，但係都未整理....睇住一張先啦，因為今次個digial有充足既電源，所以亦影咁好多食物既相，等我整理好之係同大家一一介紹。

Bali 巴里酒店介紹

如來對上一次係到寫野都有差唔多成個月啦，唔好意思近來都好忙，又要搞去法國既野，又要搞埋份工handover既野。而且我聽日會去越南，但係今日都未搵到酒店，去到先搵我就無乜所謂，不過Michel會覺得人生路不熟無乜安全感。
係到整理我既e貓既時候發現上年去巴里時book resort - Abian Biu Residence既e貓，嗰間resort離kuta大概5分鐘車程，唔係好grand，不過就非常咁relax，同我之前係cambodia既都係差唔多咁正，而且仲有spa，我都試過佢既foot massage，做完之係就瞓到正隻肥豬咁，行左成日就係要架。而且每晚大概要50蚊美金，係巴里來講都叫平。

一些柬埔寨資料 (二) - 飲食篇

都唔經唔覺，如來自己都好耐無更新呢到。今次都講返一些柬埔寨既一啲資料。其實當我地係嗰到既時候，我地都唔想成日食遊客去既餐廳，一來因為食本土人食既正宗好多，二來平好多，三來可以感受下當地人既生活。
不過就算係遊客區餐廳，6、7蚊已經可以食得好好。
係old market 附近既pub street除咗好多bar之外就有好多餐廳。咁多間餐廳之中我就會首推Soup Dragon。Soup Dragon主要賣越南同柬埔寨啲菜色，不過係我來講兩樣菜色其實都幾似。呢間餐廳分上下兩層，樓下食比較平既牛肉粉，而樓上就係貴少少既叫餸食飯。我地兩層都食過，各有各特色，不過下層就啱食晏來食。雖然話係賣牛肉粉，不過係好似火鍋咁，可以自己加野再煮，以我呢個火鍋精緊係話正啦。樓上既菜都好正，春卷都要試吓，另外仲叫咗個又好似火鍋既野，不過係醋加香芧既湯，再自己整熟啲牛肉，唔好以為會酸，係一啲都唔酸而且仲好香添。
呢個網址都介紹好多Siem Reap既餐廳，可以望望。
另外下午既時間可以行下old market嗰邊，除咗有野買之外仲要好多俾遊客既大排檔，唔係貴，一餐都係兩蚊美金咁上下，每間都會有個大menu有埋相同明碼實價，所以都幾放心。(因為去柬埔寨同去其他比較落後既地方一樣，好多地方都係分遊客價同本地人價，當你見到隔離個人同你食既一樣，但係佢俾5毫你俾兩蚊，真係覺得自己係隻大水魚，一啲都唔好受。)

一些柬埔寨資料 (一)

近來心情欠佳，所以更新呢到都少咗，諗咗好耐要係到提供我之前去柬埔寨既資料都仲未做到，真係唔好意思。所以會分開幾次介紹我今次去柬埔寨所到過既地方同一啲自己評語，希望為大家計劃去柬埔寨都有啲幫助。
首先係我今次住既地方 - Borann, l'Auberge des temples, 並唔係一間大酒店，而係一個好舒適既渡假屋，呢到有一個游泳池，一個餐廳同埋個大花園。無間房都有一個露台/平台，可以係下午坐係長椅慢慢休息，但係記得係booking既時候同佢地講要樓上既房，因為樓下既房無露台，而且俾啲樹圍住，無咁開揚，而且亦多蚊。另外亦唔好睇少個泳池既作用，因為柬埔寨都係比較熱，我去既時候平均下午最熱都有35度到，所以通常12-3點咁熱既時候都會返酒店游個水，涼一涼。所以如果搵酒店都記得睇吓佢有無泳池。
另外佢都有一個細細既餐廳，只係招侍酒店既住客，雖然係細細地，但食物水準一d都唔差，雖然只係食過一餐但係就非常滿意。但因為希望不斷試新野，所以多係出面食飯。
呢到既位置亦都唔錯，周圍都有好多野食，而且去old market，temples同機場都好近。
以我經驗，如果直接打去Borann book房會平過係其他網站用credit card book，而我連埋稅要雙人冷氣房都係50蚊美金，所以比係其它網站book會平咗10蚊有多。同埋記得打電話去book，因為如果用email book既話有delay，急既話就要等多一、兩日。

菲林黑白相同彩色相大比較

終於昨晚等到有得攞黑白相，但係得35mm既菲林先有得攞，而120既菲林要等多幾日到星期五先有得攞。今次係第一次影白相，所以有好多地方可以改善。
自己感覺黑白相比彩色相難影，光線既運用要好平均，相既四週都要有充足及平均既光線，唔可以有突別暗或突別光既位置，當然想營造突別效果又令作別論。所我今次影既黑白相中，就可以見到我對光線既運用唔夠平均，影相既時候同影彩色相使用既技巧一樣，所以最後出來既效果真係強差人意.....
另外影黑日相既氣氛同影色既相很不同，能利用黑日相表達所影既事物既一種獨特氣氛，就是大師級的造詣了，想我再用多幾年時間也未必掌握得到。唯有努力啦!
另外如果可以有間快圖美可以專俾人沖晒黑日相就可，一來唔使等咁耐，二來品質可以比普通晒相舖有保證，三來係唔鐘意可以退錢麻!!!

不錯的相

今次去cambodia亦有同Erwan會合，家陣佢係星加坡讀緊MBA，所以都有幾個月無見。大家都喜愛影相，不過都係未可以好好掌握到攝影既技巧，所以如果影到張靚既就會好好好好開心。好似呢張相咁係Erwan佢影架，我都覺得好靚呀,你地話呢，而坐係swimming pool邊既就係好幫佢影既一張。

English version for Erwan:
This time we also met up with Erwan who is now studying MBA in Singapore and haven't seen each other for a few months. We both share the same enthusiasm about photography, despite of our immature photo taking techniques. Here is the photo taken by him in Angor, which I truely loved with all the colours and formation of the photos. And he also posed for my photos below.

我從柬埔寨回來啦

今次總共去咗柬埔寨5日，都係留係Siem reap區，所時間唔太趕。星期五晚到，星期三一早機返香港。有三日時間行咗Angkor既廟，而有一日就去咗比較遍遠既floating village。除咗睇到咁壯觀既廟宇，亦都睇到文化既差異。係無電視、手提電話既五日裡享受到寧靜。但由於當地既生活好窮困，好多孩子既屋企都唔可以供佢地返學，而佢地好細個開始(見過細到得兩歲)就會係旅遊區售賣guidebook同手工品，有感香港既小孩係幾咁幸福，如果我有細路都會帶佢地去感受一下。

唔講太多，睇相啦！

今年第一份生日禮物

雖然仲有幾日先到生日，但係由於我地聽日會去cambodia，而正日又係嗰邊度過，所以今日同michel就已經交換咗禮物(如果你未知，我同michel係喺同一日生日既)。而我既生日禮物就係呢部Lecia相機呀，呢個簡直係我既dream gift，所以今日成日都好開心呀。下午仲已經用咗部相機周圍咁影去試部相機啦，影咗出來既相好靚呀。
夾埋之前買既rolleiflex，去到cambodia想影乜都得啦，我諗下次如果要買相機都會係好耐之後既事啦。

法式沙律醬 - French salad dressing

今日係網上想搵點樣整Cesar salad既沙律醬但係搵極都搵唔到。唔知點解咁難搵，而且係超級市場買到既又有好多防副劑，開樽係又要好快食完唔係會懷，所以都係自己整好。我都識整法式沙律醬，所以係到同你地分享下，剩咗啲錢買下零食好過:

材料:
法式芥辣 - 三湯匙
鹽 - 一茶匙
黑椒粉 - 一茶匙
white wine vinegar - 一湯匙 (city super，百佳superstore,the great都有得買，如果無可以用lemon汁代替)
extra virgin olive oil - 五湯匙

做法:
先張法式芥辣、鹽、黑椒粉混好，再加入vinegar混好，最後加入olive oil攪到同芥辣完全混在一齊就得架啦。

其實所有既份量都可以因應個人喜好加減，不過olive oil同芥辣應該為主要成份。

等我搵到cesar salad 既dressing再話俾大家知啦。

師奶病發作

我之前介紹過既Pantry Magic, 今日正式開張，之前收到佢地既e-貓話所有今日既來賓都有20%折扣，咁我當然不斷提Michel今日一定要去掃貨，最後就買咗幾樣之前睇中既幾件野再加上幾件新睇中既。平時已經唔係貴，再加上discount就更加抵。今次之後應該有排都唔使入貨啦。

買到啦!!

終於買到啦!! 開心死我啦，但係唔係海鷗，最係都因為質素問題買咗部Rolliflex。到家陣一張相都未影過囉，緊係啦，菲林要錢架，唔係數碼，又係120菲林，緊係要就住就住。不過如果聽日天氣好，會去志蓮靜苑影相。但係又唔係數碼，我有無scanner，所以要post上來都要等我置部scanner先，不過近日會好多洗費，下星期又會去angkor wat，都應該要有排等....
如果要買傳統機，可以去呢到睇睇先，因為個老闆幾好人，慢慢咁教我點用部相機，只於平唔平?我可以講我覺得合理囉!
天祥影集 - 九龍尖沙咀加拿芬道42-44號地下 Tel: 2723 3266

有新野玩呀

等咗咁耐終於有新驚啦，係呀我日日都會上馬仔市集睇吓佢個好搞笑既日記架，今日見到佢出咗新驚，緊係第一時間話俾大家知啦。當你做野做到悶悶地既時候可以玩一玩，唔好等啦
Be my guest!